ეს ვიზიტი გახლავთ რეგიონში უსაფრთხოებისა და სტაბილურობის განმტკიცების პროცესში საქართველოს როლის ხაზგასმა.
ბუნებრივია, შეხვედრების ერთ-ერთი მთავარი თემა იქნება საქართველოს ტერიტორიების ოკუპაცია, ადგილზე არსებული მძიმე უსაფრთხოების და ჰუმანიტარული გარემო. საქართველოს აქვს აშშ-ის მტკიცე მხარდაჭერა ქვეყნის სუვერენიტეტისა და ტერიტორიული მთლიანობის მიმართ და რაც ყველაზე მნიშვნელოვანია, ეს მხარდაჭერა ბოლო წლების განმალობაში გამოიხატა სტრატეგიული პარტნიორის მხრიდან გადადგმულ კონკრეტულ და ქმედით ნაბიჯებში (აშშ-ის კონსოლიდირებული ასიგნებების აქტი, ჩანაწერი ოკუპაციაზე, საქართველოს მხარდამჭერი აქტი, ჩანაწერი სანქციებსა და ოკუპაციაზე...) ჩვენ მოველით, რომ ვიზიტის ფარგლებში კიდევ ერთხელ გაჟღერდება ეს მხარდაჭერა.
აშშ-საქართველოს სტრატეგიული პარტნიორობის ერთ-ერთი მნიშვნელოვანი მიმართულებაა თავდაცვისა და უსაფრთხოების სფერო; ბოლო წლების განმალობაში ამ კუთხით თანამშრომლობა ხელშესახები შედეგებით გამოირჩევა. ჩვენი სტრატეგიული პარტნიორი ხმამაღლა აღნიშნავს საქართველოს განსაკუთრებულ წვლილს გლობალური უსაფრთხოების უზრუნველყოფის პროცესში, ჩვენი ქვეყნის წარმატებულ ნაბიჯებს თავდაცვისუნარიანობის განმტკიცებისა და ალიანსში ინტეგრაციის მიმართულებით. მოველით, რომ აღნიშნული ვიზიტის ფარგლებში, ისევე, როგორც ყველა მაღალი დონის შეხვედრისას, კიდევ ერთხელ მივიღებთ ვაშინგტონის მხარდამჭერ გზავნილს და ქმედით ნაბიჯებს როგორც საქართველოს ალიანსში ინტეგრაციის მიმართულებით, ისე რეგიონში უსაფრთხოების უზრუნველყოფის პროცესში. ჩვენ ყველა კარგად ვაცნობიერებთ, ამ კუთხით, სტრატეგიული პარტნიორის განსაკუთრებულ როლს და საქართველო-აშშ-ის თანამშრომლობის მნიშვნელობას.
ვიმედოვნებთ, რომ მაიკ პომპეოს ვიზიტი მაქსიმალურად იქნება გამოყენებული იმისთვის, რომ კიდევ ერთხელ, განსაკუთრებული ხაზგასმა მოხდეს საქართველოსა და ამერიკას შორის სტრატეგიული პარტნიორობის, იმის, რომ საქართველო არის ამერიკის ყველაზე ახლო მოკავშირე და მთავარი დასაყრდენი. დარწმუნებული ვარ, რომ ვიზიტის შედეგად სტრატეგიული პარტნიორობა, თვისობრივად კიდევ უფრო მაღალ დონეზე გადავა.
საქართველოს საექსპერტო წრეების მიმართვა აშშ-ს საჯარისო შენაერთების მუდმივი განთავსების თაობაზე:
- სტრატეგიულ პარტნიორთან თანამშრომლობის გაღრმავების და ჩვენი ქვეყნის უსაფრთხო და სტაბილური განვითარების პროცესში აშშ-ის როლის მნიშვნელობაზე სასურველია, რომ ქვეყანაში არსებობდეს კონსენსუსი. საქართველოს ხელისუფლებამ ბოლო წლების განმავლობაში გადადგა ქმედითი ნაბიჯები ქვეყნის თავდაცვისუნარიოანობის განმტკიცებისა და სტაბილურობის უზრუნველყფის პროცესში ჩვენი სტრატეგიული პარტნიორის მაქსიმალური ჩართულობისთვის. ამ მაღალი დონის სანდოობის შედეგია გაღრმავებული თანამშრომლობა თავდაცვის სფეროში, აშშ-ს მხრიდან თავდაცვის სფეროს განვითარების და ნატო-სთან თავსებადობის ამაღლების მიმართულებით გაწეული დახმარება; საქართველოს სულ უფრო ინტენსიური მონაწილეობა აშშ-სა, თუ ალიანსის ერთობლივ სამხედრო წვრთნებში, საქართველოს აქტიური ჩართულობა და ჩვენი როლის ხაზგასმა შავი ზღვის უსაფრთხოების პროცესში. სწორედ ბოლო წლების განმალობაში ჩვენმა თანმიმდევრულმა პოლიტიკამ და სტრატეგიულ პარტნიორთან ინტენსიურმა და ნაყოფიერმა მუშაობამ განაპირობა ის, რომ დღეს აშშ-საქართველოს თანამშრომლობა უსაფრთხოების სფეროში არის უმაღლეს ნიშნულზე. ამის დადასტურებაა 2016 წელს საქართველოსა და აშშ-ს თავდაცვის სფეროში თანამშრომლობის შესახებ მემორანდუმის გაფორმება, 2017 წელს თავდაცვის მზადყოფნის პროგრამის შესახებ მემორანდუმის გაფორმება, აშშ-ის გადაწყვეტილება საქართველოსთვის ტანკსაწინააღმდეგო მართვადი სისტემების გადმოცემის შესახებ. ეს ყველაფერი სწორედ რომ ემსახურება საქართველოს თავდაცვითი შესაძლებლობების გაძლიერებას და წარმოადგენს ჩვენი სტრატეგიული პარტნიორის ძალზედ კონკრეტულ და ფუნდამენტურ დახმარებას ამ მიმართულებით და ვაშინგტონის პირდაპირ ჩართულობას საქართველოს უსაფრთხოების განმტკიცების პროცესში. დარწმუნებულები ვართ, მაიკ პომპეოს ვიზიტი ამ მიმართულებით ასევე მოიტანს სამომავლოდ კონკრეტულ ხელშესახებ შედეგებს.
*მაიკ პომპეოს ვიზიტის დროს განხილული იქნება თუ არა შიდა პოლიტიკური საკითხები: *
- მოგეხსნებათ, რომ ჩვენი სტრატეგიული პარტნიორის როლი საქართველოს დემოკრატიული და ინსტიტუციური განვითარების მიმართულებით უმნიშვნელოვანესია. ბოლო წლების განმალობაში ჩვენ აშშ-სთან მჭიდრო თანამშრომლობით გადავდგით სერიოზული ნაბიჯები ქვეყანაში დემოკრატიის კონსოლიდაციის კუთხით და ამას სათანადო შეფასებას აძლევს ვაშინგტონი. ჩვენი ოპონენტების ნებისმიერი მცდელობა, რომ აღნიშნული ვიზიტი დაუკავშირონ ქვეყანაში მიმდინარე საარჩევნო პროცესსა და პოლემიკას, ეს უბრალოდ არასათანადო აღქმაა აღნიშნული ვიზიტის მნიშვნელობის. საარჩევნო პროცესთან დაკავშირებით ქართულმა საზოგადოებამ უკვე იხილა საქართველოში აშშ-ის საელჩოს არაერთი განცხადება. ასევე, მოგეხსენებათ, რომ აშშ-ის ელჩი საქართველოში, ევროკავშირის მისიის ხელმძღვანელთან ერთად აქტიურად არის ჩართული და ასრულებს პარტიათა მოლაპარაკების პროცესში ფასილიტატორის როლს. შესაბამისად, ეს უკვე გახლავთ ის ქმედითი ნაბიჯები, რასაც ჩვენი სტრატეგიული პარტნიორი მიმართავს საქართველოში პოლიტიკური დაძაბულობის განსამუხტად. რაც შეეხება სახელმწიფო მდივნის ვიზიტს, ვისურვებდით, რომ საქართველოში ყველა პოლიტიკური ჯგუფის წარმომადგენელმა, რეგიონში არსებული ტურბულენტური გარემოს გათვალისწინებით, სათანადოდ გააცნობიეროს ამ ვიზიტის გეოპოლიტიკური მნიშვნელობა.