ქალთა მიმართ  ძალადობის ან/და ოჯახში ძალადობის მსხვერპლთა გამოვლენის, მათი დაცვის, დახმარებისა და რეაბილიტაციის ეროვნული რეფერირების პროცედურებში (ეროვნული რეფერალური მექანიზმი), მიზანშეწონილია გათვალისწინებულ იქნეს „საჯარო სამსახურის შესახებ“ საქართველოს კანონითა და საქართველოს შრომის კოდექსით  განსაზღვრული სამართლებრივი რეგულაცია ქალთა მიმართ ძალადობის ან/და ოჯახში ძალადობის მსხვერპლის თავშესაფარში ან/და კრიზისულ ცენტრში მოთავსების საკითხთან მიმართებაში. 

„საჯარო სამსახურის შესახებ“ საქართველოს კანონის 55-ე მუხლის მე-2 პუნქტის „ვ“ ქვეპუნქტის თანახმად, მოხელის სამსახურებრივი უფლებამოსილება ჩერდება ქალთა მიმართ ძალადობის ან/და ოჯახში ძალადობის მსხვერპლის თავშესაფარში ან კრიზისულ ცენტრში მოთავსებისას, თუ მოხელეს აღარ შეუძლია სამსახურებრივი მოვალეობის შესრულება, მაგრამ წელიწადში არაუმეტეს 30 კალენდარული დღისა. ამ შემთხვევაში შესაბამისი საჯარო დაწესებულებისათვის შეტყობინების ვალდებულება ეკისრება მოხელისათვის მომსახურების გამწევ ორგანიზაციას. 

ასევე, საქართველოს შრომის კოდექსიც ითვალისწინებს სამსახურებრივი უფლებამოსილების შეჩერების საფუძვლებში ქალთა მიმართ ძალადობის ან/და ოჯახში ძალადობის მსხვერპლის თავშესაფარში ან/და კრიზისულ ცენტრში მოთავსების საკითხს, თუ იგი ვეღარ ასრულებს სამსახურებრივ მოვალეობას, მაგრამ წელიწადში არაუმეტეს 30 კალენდარული დღისა.

ამდენად, მიზანშეწონილია ეროვნულ რეფერალურ მექანიზმში გაიწეროს შესაბამისი პროცედურები ზემოხსენებული ნორმების პრაქტიკაში სწორი და ერთგვაროვანი იმპლემენტაციის მიზნით, რაც ერთის მხრივ, თანხვედრაში იქნება და წინააღმდეგობაში არ მოვა არსებულ საკანონმდებლო რეგულაციებთან და მეორე მხრივ, უზრუნველყოფს ქალთა მიმართ ძალადობის და ოჯახში ძალადობის მსხვერპლთა მხარდაჭერას.