მოგესალმებით კიდევ ერთხელ,

წინა წერილზე დამატებით გატყობინებთ, რომ გაზიარებული დღის წესრიგის თანახმად, მიმდინარე თვის 16 აპრილს, 14:00 საათზე საქართველოს მთავრობის ადმინისტრაციაში (მე-3 სართული, მე-2 სათათბირო ოთახი) გაიმართება მისიის შეხვედრა იმ სამინისტროების წარმომადგენლებთან, რომლებმაც ფინანსური ხელშეკრულების 1.1.3 და 1.1.4 ინდიკატორების შესაბამისად მოამზადეს მონიტორინგისა და შეფასების ანგარიშები.

შეხვედრაზე მისიის სავარაუდო კითხვები შეეხება:

-         ანგარიშების მომზადების პროცესს;

-         ანგარიშების შემუშავების პროცესში რამდენად დაეყრდენით „მთავრობის საქმიანობის, მონიტორინგის, ანგარიშგებისა და შეფასების სისტემის დამტკიცების თაობაზე“ საქართველოს მთავრობის N 628 დადგენილებას;

-         თანამშრომლობა საქართველოს მთავრობის ადმინისტრაციასთან ანგარიშების შემუშავების და დახვეწის პროცესში;

-         სამოქმედო გეგმების ბიუჯეტირების პროცესი და მისი კავშირის უზრუნველყოფა ცენტრალური ფინანსური დაგეგმვის დოკუმენტებთან (სახელმწიფო ბიუჯეტი, BDD)

ასევე, მისია ზოგადად განიხილავს, თუ როგორია თქვენი ჩართულობა პოლიტიკის დაგეგმვის მიმდინარე რეფორმის პროცესში.

გთხოვთ, 15 აპრილს, დღის ბოლომდე დაგვიდასტუროთ აღნიშნულ შეხვედრაში თქვენი მონაწილეობა.

პატივისცემით,

კოლეგებო მოგესალმებით,

როგორც მოგეხსენებათ, ევროკავშირის საბიუჯეტო დახმარების მისიის ექსპერტები უკვე საქართველოში იმყოფებიან და მართავენ შეხვედრებს პროგრამით გათვალისწინებულ პასუხისმგებელ უწყებებთან.

თქვენთან კონსულტაციების საფუძველზე და ყველა მხარის მოთხოვნის შეძლებისდაგვარად გათვალისწინებით, ჩვენ, როგორც საჯარო მმართველობის რეფორმის მაკოორდინირებელმა უწყებამ, შევიმუშავეთ მისიის შეხვედრების დღის წესრიგი და სატელეფონო კომუნიკაციის მეშვეობით შევათანხმეთ თქვენთან შესაბამისი შეხვედრების დრო და სხვა დეტალები. თანდართული დოკუმენტის სახით გიგზავნით განახლებულ დღის წესრიგს დღევანდელი მდგომარეობით.

აქვე მოგახსენებთ, რომ განსახილველი თემატიკიდან გამომდინარე, რიგი შეხვედრები დაგეგმილზე მეტად ხანგრძლივდება, რასაც სამდივნო, სამწუხაროდ, ვერ ვაკონტროლებთ. შესაბამისად, მისიის წარმომადგენლებმა შესაძლოა ვერ მოახერხონ თქვენთან ზუსტად დათქმულ დროზე მოსვლა, რასაც გთხოვთ, გაგებით მოეკიდოთ. საყურადღებოა, რომ მათ ქალაქში გადაადგილებაც უწევთ, რაც საცობების გათვალისწინებით, დამატებითი წინაღობაა.

რაც შეეხება შინაარსობრივ მხარეს, როგორც იცით, მისიისთვის წარსადგენად თითოეული უწყება გვაწოდებს მტკიცებულებებს. დამკვიდრებული პრაქტიკის შესაბამისად, აღნიშნულ დოკუმენტებს ჩვენ ერთიანი პაკეტის სახით ვაწოდებთ მისიას. გამონაკლისი არც წლევანდელი ვიზიტია, თქვენგან მიღებულ დოკუმენტებს ჩვენ არა დაფორვარდების რეჟიმში, არამედ, ერთიანად გავუზიარებთ ექსპერტებს. ამ ეტაპზე საბოლოო პაკეტის მიწოდება ორშაბათისთვის იგეგმება.

აქვე, გვსურს, მადლობა გადავუხადოთ უწყებებს, რომლებიც ითვალისწინებენ საერთო ინტერესებს და მისიისთვის წარსადგენი დოკუმენტების თარგმნას უზრუნველყოფენ.

ვინაიდან დოკუმენტები მოცულობითია, ხოლო იმ დოკუმენტების თარგმანის უზრუნველყოფა, რომლებიც ქართულად მომზადდა გარკვეულ დროს საჭიროებს, აუცილებელია მისია მათ შინაარსს ვიზიტის დასრულებამდე გაეცნოს, მისიის მოთხოვნაა სამინისტროების მიერ სტრატეგიების/სამოქმედო გეგმების შესახებ შემუშავებულ თითოეულ მონიტორინგის და შეფასების ანგარიშზე მომზადდეს მოკლე ნარატივი (Executive Summary) ინგლისურ ენაზე, რომელიც აღწერს სრული ანგარიშის მთავარ საკითხებს და მოკლედ განმარტავს თითოეული თავის შინაარსს. შესაბამისად, უწყებებს, რომლებმაც მოამზადეს ზემოაღნიშნული მონიტორინგისა და შეფასების ანგარიშები, გთხოვთ, მოკლე ნარატივი მოგვაწოდოთ ორშაბათს, დილის 12:00 საათამდე. ასეთი მოკლე აღწერილობითი დოკუმენტი შესაძლებლობას მისცემს მისიის ექსპერტებს შეხვედრების ფორმატში, თქვენთან ერთად, განიხილონ გარკვეული საკითხები, მათი ინტერესებიდან გამომდინარე.

როგორც მოგეხსენებათ, მისიის ბოლო ვიზიტი განსაკუთრებული მნიშვნელობის მატარებელია ქვეყნისთვის, შესაბამისად, თითოეული შეხვედრის წარმატებით ჩატარება და გაწეული სამუშაოების ეფექტურად წარმოჩენა არა მხოლოდ რეფორმის სამდივნოს, არამედ ყველა უწყების საერთო ინტერესია.

მადლობა ამ მნიშვნელოვან პროცესში თანამშრომლობისთვის.

პატივისცემით,