ევროპარლამენტმა დღეს დიდი უმრავლესობით მხარი დაუჭირა ანგარიშს, რომლითაც რეკომენდაციებს აძლევს ევროკავშირის საბჭოს, ევროკომისიას და ევროკავშირის უმაღლეს წარმომადგენელს „აღმოსავლეთ პარტნიორობის“ მომავალთან დაკავშირებით. რეკომენდაციები აღმოსავლეთ პარტნიორობის მომავალი სამიტისთვის კონკრეტულ ინიციატივებსა და წინადადებებს მოიცავს.

აღმოსავლეთ პარტნიორობის მომავალზე ამ რეკომენდაციებით ევროპარლამენტმა კიდევ ერთხელ გამოხატა მხარდაჭერა საქართველოს ევროპული ინტეგრაციის, დემოკრატიული განვითარების და ეკონომიკური კეთილდღეობის მიმართ. აღსანიშნავია, რომ ევროპარლამენტის ამ რეკომენდაციებში ასახულია ყველა ის პრიორიტეტიც, რომელიც საქართველოს აქვს ევროინტეგრაციის კუთხით.

ეს ევროპარლამენტის რიგით მეორე ანგარიშია, რომელიც რეკომენდაციებს აძლევს ევროკავშირის საბჭოს, ევროკომიასა და უმაღლეს წარმომადგენელს აღმოსავლეთ პარტნიორობის სამიტის წინ. პირველი ასეთი რეკომენდაციები ევროპარლამენტმა 2017 წელს - აღმოსავლეთ პარტნიორობის ბრიუსელის სამიტის წინ გასცა.

·         აღსანიშნავია, რომ ევროპარლამენტი კვლავ ხაზგასმით აღნიშნავს, რომ ნებისმიერ ევროპულ სახელმწიფოს, რომელიც ეფუძნება იმავე ღირებულებებს, რომელსაც ევროკავშირი, შეუძლია განაცხადი გააკეთოს ევროკავშირის წევრობისთვის. ევროპარლამენტი ასევე მიუთითებს, რომ აღმოსავლეთ პარტნიორობის ქვეყნებს უფლება აქვთ, თავისუფლად აირჩიონ ევროკავშირთან თანამშრომლობისა და ინტეგრაციის დონე და გმობენ ამ არჩევანზე გარე ძალების ჩარევის მცდელობებს.  ეს მეტად მნიშვნელოვანი პოლიტიკური გზავნილია აღმოსავლეთ პარტნიორობის იმ ქვეყნებისთვის - მათ შორის საქართველოსთვის - რომელთა მიზანი ევროკავშირში გაწევრიანებაა.

·         ამასთანავე, ევროპარლამენტი მოუწოდებს ევროკავშირის საბჭოს, ევროკომისიასა და უმაღლეს წარმომადგენელს, სწრაფად შეიმუშაონ აღმოსავლეთ პარტნიორობის მომავალი ათწლეულის  სტრატეგიული და მომავალზე ორიენტირებული ხედვა და უზრუნველყონ, რომ აღმოსავლეთ პარტნიორობის მომავალი სამიტის დასკვნითი დოკუმენტი 2020 წლის შემდეგ აღმოსავლეთ პარტნიორობის განვითარების მკაფიო სტრატეგიას მოიცავდეს.

·         ევროპარლამენტი აღნიშნავს, რომ საქართველოს, მოლდოვას და უკრაინის, როგორც ასოცირებულ პარტნიორების, მიმართ ევროკავშირის განსხვავებულმა მიდგომამ საფუძველი უნდა მისცეს კიდევ უფრო გაღრმავებული ორმხრივი ურთიერთობების ფორმატებსა და მიმართულებებს და, ამ მხრივ, რეკომენდაციები თანამშრომლობის მნიშვნელოვან ინიციატივებსა და წინადადებებს მოიცავს.  კონკრეტულად, ევროპარლამენტი მოუწოდებს ევროკავშირის ინსტიტუტებს, განიხილონ სამი ასოცირებული პარტნიორისთვის გაღრმავებული თანამშრომლობის სტრატეგია, რომლითაც დაარსდებოდა რეფორმებისა და ინვესტიციების ხელშეწყობის პროგრამა ტრანსპორტის, ინფრასტრუქტურის, ენერგეტიკის, მართლმსაჯულების, ციფრული ეკონომიკის სფეროებში. ასეთმა დიალოგმა შესაძლოა, მოიცვას ამ ასოცირებული ქვეყნების ლიდერებთან შეხვედრები ევროპული საბჭოს მიმდინარეობისას და, ასევე, ამ ქვეყნების წარმომადგენელთა რეგულარული მონაწილეობა ევროკავშირის საბჭოს სამუშაო ჯგუფებსა და კომიტეტებში.

·         მნიშვნელოვანია, რომ ევროპარლამენტი ასევე მოუწოდებს საბჭოს, კომისიასა და უმაღლეს წარმომადგენელს, უფრო მეტი ფინანსური დახმარება გაუწიონ აღმოსავლეთ პარტნიორობის ქვეყნებს, განსაკუთრებით სამ ასოცირებულ ქვეყანას, დამატებითი პოლიტიკური, ადმინისტრაციული და ფინანსური დახმარების სახით.  ეს მეტად მნიშვნელოვანი რეკომენდაციაა, ვინაიდან საქართველო სხვადასხვა სფეროში არაერთ რეფორმას ახორციელებს, რაც ასევე გათვალისწინებულია ევროკავშირთან ასოცირების შეთანხმებით. შესაბამისად, ევროკავშირის მხრიდან დამატებით ფინანსურ მხარდაჭერას მნიშვნელოვანი გავლენა ექნება ამ რეფორმების წარმატებით განხორციელებაზე და ევროკავშირთან ასოცირების შეთანხმებით გათვალისწინებული ვალდებულებების შესრულებაზე.

·         ევროპარლამენტის რეკომენდაციაა, რომ ევროკავშირმა ხელი შეუწყოს ასოცირების შეთანხმების, კერძოდ, ღრმა და ყოვლისმომცველი თავისუფალი ვაჭრობის ნაწილის განხორციელებას, რათა თანდათან შეიქმნას პირობები ევროკავშირის პარტნიორი ქვეყნებისთვის ერთიანი ბაზრის გახსნისთვის და, ამავდროულად, საერთო ეკონომიკური სივრცის შექმნისთვის. ამავე დროს, რეკომენდაციებში საუბარია დაინტერესებული პარტნიორი ქვეყნების თანდათანობით სექტორულ ინტეგრაციაზე ევროკავშირში, მათ შორის, ევროკავშირის ენერგეტიკულ კავშირში, სატრანსპორტო გაერთიანებასა და ევროკავშირის ერთიან ციფრულ ბაზარზე, საბანკო და ფინანსურ სფეროებში. ეს კი საბოლოო ჯამში მიზნად ისახავს საქართველოს მაქსიმალურ დაახლოებას ევროკავშირის ნორმებთან და სტანდარტებთან, რაც უზრუნველყოფს საქართველოში წარმოებისა და მომსახურების დონისა გაუმჯობესებას. ამავდროულად, საქართველო სულ უფრო და უფრო უახლოვდება ევროკავშირში ინტეგრაციისა და შესაბამისად განვითარების იმ დონეს, რომელიც აუცილებელია ევროკავშირში გაწევრიანების კრიტერიუმების დასაკმაყოფილებლად.

·         რეკომენდაციებში ხაზგასმულია შავი ზღვის დამაკავშირებელი პოტენციალის უკეთესად გამოყენების აუცილებლობა და გამოხატულია მხარდაჭერა ინფრასტრუქტურული პროექტებისადმი, რომლებიც გადამწყვეტია როგორც  ჩვენს რეგიონთან, ასევე ცენტრალურ აზიასთან კავშირის გასაძლიერებლად.

·         ევროპარლამენტი უჭერს მხარს საგანმანათლებლო რეფორმებს აღმოსავლეთ პარტნიორობის დაინტერესებულ ქვეყნებში და მოუწოდებს შესაბამის ინსტიტუტებს, გაიზარდოს დაფინანსება პარტნიორობის ქვეყნების საგანმანათლებლო, პროფესიული უნარების გაძლიერების და გაცვლით პროგრამებში მეტი მონაწილეობისათვის , როგორიცაა  Erasmus +, Creative Europe.

·         მნიშვნელოვანია, რომ ევროპარლამენტის რეკომენდაციებში განსაკუთრებული ყურადღება ეთმობა უსაფრთხოებისა და კონფლიქტების მშვიდობიანი მოგვარების საკითხს.

·         ევროპარლამენტი გმობს EaP-ის ქვეყნების სუვერენიტეტისა და ტერიტორიული მთლიანობის დარღვევას, არ ცნობს მათი საზღვრების ძალისმიერ ცვლილებებს და ტერიტორიების ანექსიის მცდელობას; ადასტურებს ამ ქვეყნების ტერიტორიული მთლიანობისადმი ერთგულებას  საერთაშორისოდ აღიარებულ საზღვრებში;

·         ევროპარლამენტარები აღნიშნავენ, რომ ევროპის კეთილდღეობა და უსაფრთხოება მჭიდროდაა დაკავშირებული მეზობელ ქვეყნებში და, განსაკუთრებით აღმოსავლეთ პარტნიორობის ქვეყნებში, არსებულ ვითარებასთან. შესაბამისად, ევროპარლამენტი მოუწოდებს საბჭოს, ევროკომისიასა და უმაღლეს წარმომადგენელს, რომ მათაც წვლილი შეიტანონ, რათა აღიკვეთოს აღმოსავლეთ პარტნიორობის სახელმწიფოების პოლიტიკურ, საარჩევნო და სხვა დემოკრატიულ პროცესებში მესამე მხარის ჩარევა, მათ შორის, დეზინფორმაციის გავრცელებით, უკანონო პოლიტიკური დაფინანსებით, პოლიტიკურ და მედია აქტორებზე კიბერშეტევებითა და სხვა საშუალებებით.

·         რეკომენდაციებში ასევე აღნიშნულია კიბერ სფეროში თანამშრომლობის აუცილებლობა, განსაკუთრებით 2019 წლის ოქტომბერში საქართველოს წინააღმდეგ რუსეთის მიერ განხორციელებული კიბერშეტევის შემდეგ.

·         ევროპარლამენტი მოუწოდებს ევროკავშირის ინსტიტუტებს, განსაზღვრონ უფრო აქტიური როლი ევროკავშირისთვის აღმოსავლეთ სამეზობლოში მიმდინარე კონფლიქტების მშვიდობიანი გზით გადაჭრისა და მომავალი კონფლიქტების თავიდან აცილების მიზნით, და ამავდროულად მიესალმება მოლაპარაკების არსებულ ფორმატებსა და პროცესებს, როგორიცაა ჟენევის საერთაშორისო მოლაპარაკებები.

·         ევროპარლამენტი მკაცრად გმობს მიმდინარე საერთაშორისო სამართლის ფუნდამენტური პრინციპებისა და ნორმების დარღვევას აღმოსავლეთ პარტნიორობის რეგიონში, კერძოდ, აღმოსავლეთ პარტნიორობის ქვეყნებში რუსეთის ფედერაციის მიერ ოკუპაციას და ტერიტორიების ანექსიას, ასევე, რუსეთის უარს საერთაშორისო ტრიბუნალებისა და სასამართლოების გადაწყვეტილებების შესრულებაზე.

·         ევროპარლამენტი მოუწოდებს ოკუპირებული ტერიტორიებიდან უცხოური ჯარების დაუყოვნებლივ გაყვანისკენ და სამხედრო მოქმედებების დასრულებისკენ, რაც იწვევს მშვიდობიანი მოსახლეობის და ჯარისკაცების დაღუპვას და, ამავე დროს, ხელს უშლის სოციალურ-ეკონომიკურ განვითარებას და, შესაბამისად, ასობით ათასი დევნილის დაბრუნებას. 

·         ევროპარლამენტი გასცემს რეკომენდაციას, რომ უზრუნველყოფილ იქნას, რომ ევროკავშირის მხარდაჭერის ყველა პროგრამის სამიზნე ჯგუფებს შეადგენდეს საზოგადოების ყველაზე დაუცველი და მოწყვლადი ჯგუფები, მათ შორის ძალადობრივი კონფლიქტის მქონე ტერიტორიებიდან ლტოლვილები და იძულებით გადაადგილებული პირები; განმტკიცდეს ინიციატივები ამ ჯგუფების პოლიტიკურ და სოციალურ-ეკონომიკურ გაძლიერებაზე და გაუმჯობესდეს მათი წვდომა განათლებაზე, ჯანდაცვაზე და ღირსეულ საცხოვრებელზე. 

·         ძალზე მნიშვნელოვანია, რომ ევროპარლამენტი მოუწოდებს ევროკავშირის ინსტიტუტებს, მიიღონ ევროკავშირის ადამიანის უფლებათა დარღვევის სანქციების მექანიზმი ან ევროკავშირის „მაგნიცკის აქტი“, იმ პირებისა და ორგანიზაციების მიმართ, რომლებიც არღვევენ ადამიანის უფლებებსა და ძირითად თავისუფლებებს, განსაკუთრებით სამოქალაქო საზოგადოების, ოპოზიციის აქტივისტებისა და  ჟურნალისტების თავისუფლების შეზღუდვის, გატაცებებისა და ცემის, მშვიდობიანი საპროტესტო აქციების ძალადობრივი რეპრესიების გზით და, ასევე, იმ პირების მიმართ, რომლებიც ჩართული არიან მაღალი დონის კორუფციაში.a