მოგესალმებით ძვირფასო კოლეგებო და მეგობრებო,

დაპირებისამებრ, გიზიარებთ დეტალურ ინფორმაციას ადამიანის უფლებათა საბჭოს განახლებული სტრუქტურის შესახებ. გთხოვთ  11 იანვრამდე ამავე წერილზე პასუხით გაგვიზიაროთ შენიშვნები და მოსაზრებები ასეთის არსებობის შემთხვევაში, რათა ჩვენ ავსახოთ ისინი სტრუქტურაში და დავამტკიცოთ იანვარში დაგეგმილ საბჭოს სხდომამდე.

• პირველი მნიშვნელოვანი ცვლილებაა საბჭოს გარდაქმნა მონიტორინგის, შეფასებისა და ანგარიშგების ეროვნულ მექანიზმად. დე ფაქტო საბჭო ამ ფუნქციებს მეტ-ნაკლებად უკვე ასრულებდა, თუმცა, არაერთი საერთაშორისო ექსპერტის რჩევით გადავწყვიტეთ ეს ფუნქციები საბჭოს დებულებაშიც ავსახოთ და უფრო ფორმალური სახე მივცეთ.

• აღნიშნული ფუნქციების უკეთ შესასრულებლად, შეიქმნება საერთაშორისო ანგარიშგების კოორდინაციის ჯგუფიც. ცხადია, აქ არ იგულისხმება საგარეო საქმეთა სამინისტროს როლის შეთვსება, არამედ ჯგუფის მიზანია უწყებებს შორის კოორდინაციის გაზრდა. ჯგუფი, რომელიც დაკომპლექტედება საგარეო და იუსტიციის მინისტრების მოადგილეებისაგან, ადამიანის უფლებათა სამდივნოს უფროსისა და ადამიანის უფლებათა მრჩევლისაგან, იქნება პასუხისმგებელი საერთაშორისო ანგარიშების მომზადების კოორდინაციაზე. ჯგუფი აქტიურად ითანამშრომლებს როგორც საკანონმდებლო, ასევე სხვა აღმასრულებელ უწყებებთან.

• იმისათვის, რომ საბჭო უფრო მოქნილი გახდეს, საბჭოს თანა-თავმჯომარედ ემატება მთავრობის ადმინისტრაციის უფროსიც.

• მოგეხსენებათ, რომ დღეს-დღეობით საბჭოს წევრი იყო ექვსი არასამთავრობო ორგანიზაცია. ნაცვლად კონკრეტული ამომწურავი ჩამონათვლისა შეიქმნება საკონსულტაციო ჯგუფი, რომელიც სრულად არასამთავრობო სექტორით იქნება დაკომპლექტებული. მიმაგრებულ დოკუმენტში იხილეთ საკონსულტაციო ჯგუფში რეგისტრაციის ფორმა. საკონსულტაციო ჯგუფი სრული შემადგენლობით შეიკრიბება წელიწადში სამჯერ. ხოლო, მიმდინარე სხდომებზე იმოქმედებს თემატური როტაციის პრინციპი. კერძოდ, სხდომის ჩატარებამდე გონივრული ვადით ადრე საკონსულტაციო ჯგუფის წევრებს დაეგზავნებათ დღის წესრიგი, რომელზეც შეეძლებათ კომენტარის გაკეთება და სხდომაზე დასწრების ინტერესის გამოხატვა. სხდომაზე დამსწრე ორგანიზაციები მოიწვევიან თემატურად, სხდომაზე გათვალისწინებული კვოტის მიხედვით.

• საბჭოს საქმიანობის ადმინისტრირებას, ორგანიზაციულ და ანალიტიკურ მხარდაჭერას უზრუნველყოფს საქართველოს მთავრობის ადმინისტრაციის ადამიანის უფლებათა დაცვის სამდივნო. სამდივნო ჩვეულ რეჟიმში გააგრძელებს ფუნქციონირებას და დაეხმარება საბჭოს როგორც პრიორიტეტულ მიმართულებებზე მუშაობაში, ასევე ადამიანის უფლებათა სამოქმედო გეგმის აღსულების შეფასებასა და მონიტორინგში.

• სხვა არაერთ მნიშვნელოვან თავთან ერთად, რომელიც სამოქმედო გეგმაშია ასახული, 2020 წლის პრიორიტეტად ადამიანის უფლებათა საბჭომ დასახა ოთხი ძირითადი და ერთი გამჭოლი მიმართულება. ესენია,
  • გენდერული თანასწორობა,  
  • ბავშვთა უფლებები,
  • ანტი-დისკრიმინაციული პოლიტიკის გატარება, და
  • შეზღუდული შესაძლებლობების მქონე პირთა უფლებები.

• მოგეხსენებათ, რომ 2017 წლიდან ფუნქციონირებს გენდერული თანასწორობის, ქალთა მიმართ ძალადობის და ოჯახში ძალადობის საკითხებზე მომუშავე უწყებათაშორისი კომისია. კომისია ჩვეულ რეჟიმში გააგრძელებს მუშაობას.  

• ასევე, ჩვეულ რეჟიმში და უფრო აქტიურად გააგრძელებს მუშაობას გაეროს ბავშვის უფლებათა კონვენციის განხორციელებისა და ბავშვთა უფლებების საკითხებზე მომუშავე უწყებათაშორისი კომისია.

• უთანასწორობათა აღმოფხვრის საკითხებში უკეთესი კოორდინაციისათვის საბჭოსა და ადამიანის უფლებათა სამდივნოს დაქვემდებარებაში იქმნება თანასწორობისა და ანტი-დისკრიმინაციულ კომისია.

• თითოეულ კომისიას ასევე ეყოლება თემატური საკონსულტაციო ჯგუფი, რომელიც დაკომპლექტდება თემატური სამოქალაქო და არასამთავრობო ორგანიზაციებისაგან და იმუშავებს თემატური როტაციის პრინციპით.

• ადამიანის უფლებათა საბჭოს მეოთხე სამოქმედო პრიორიტეტად შეზღუდული შესაძლებლობების მქონე პირთა უფლებების დაცვა განისაზღვრა. ამ ეტაპზე გავდივართ კონსულტაციებს სამოქალაქო საზოგადოებასთან გაეროს შშმ პირთა უფლებების დაცვის კონვენციის განხორციელებისა და შშმპ უფლებების საკითხების კოორდინაციის ეროვნული მექანიზმის ჩამყალიბებაზე.

• ადამიანის უფლებათა საბჭოს გამჭოლ პრიორიტეტად განისაზღვრა მუშაობა ახალგაზრდებათან ერთად.

• საბჭოსა და სამდივნოს დაქვემდებარებაში თემატური საჭიროებიდან გამომდინარე, შესაძლოა შეიქმნას ე.წ. ad hoc, დროებით ან მუდმივ მოქმედი სამუშაო ჯგუფები. მაგალითად, ბიზნესისა და ადამიანის უფლებების სამუშაო ჯგუფი, რომელიც აქტიურად ითანამშრომლებს ბიზნეს ომბუცმენთან და იმუშავებს ისეთ საკითხებზე, როგორიცაა სოციალური პასუხისმგებლობა და ა.შ. 

• და ბოლოს, ადამიანის უფლებების საბჭო 2020 წლის განმავლობაში იმუშავებ ადამიანის უფლებების ახალი სტრატეგიისა და სამოქმედო გეგმის შემუშავების მიმართულებით. მოგეხსენებათ, რომ მიმდინარე სტრატეგიას, რომელიც ძალაში 2014 წელს შევიდა ეწურება ვადა მომდევნო წლის ბოლოს.

• ამოქმედდა ადამიანის უფლებათა საბჭოს Facebook გვერდი: ადამიანის უფლებათა საბჭო • Human Rights Council, Twitter გვერდი: @HumanRightsGeo, და Instagram გვერდი: humanrightsgeo

მიმაგრებულ დოკუმენტად გიზიარებთ ადამიანის უფლებათა საბჭოს განახლებულ სტრუქტურას.

ველით თქვენს მოსაზრებებს, იდეებს, კომენტარებს.

საუკეთესო სურვილებით,