საერთაშორისო მოგზაურთა რაოდენობა 4.9%-ით გაიზარდა

 

·         2019 წლის აგვისტოში, საქართველოს 1 358 598 საერთაშორისო მოგზაურთა ეწვია,   რაც წინა წლის ანალოგიურ პერიოდთან შედარებით 4.9%-ით მეტია. 2.3%-იანი ზრდა დაფიქსირდა ტურისტული ვიზიტებში - მათი რაოდენობა აგვისტოში 753 648 შეადგენს.

·         აღსანიშნავია, რომ საქართველოს ტურიზმის სექტორში ბოლო წლებში დაფიქსირებული მაღალი ზრდის დინამიკის გათვალისწინებით, 2019 წლის აგვისტოში დაფიქსირებული ზრდა მნიშვნელოვნად ჩამორჩება არსებულ მოლოდინებს. თუმცა, გამოწვევების მიუხედავად, საქართველომ მოახერხა, მცირე პოზიტიური ტენდენციების შენარჩუნება.

·         რაც შეეხება, მოსალოდნელზე დაბალი მაჩვენებლების გამომწვევ მიზეზებს, 2019 წლის აგვისტოში რუსეთიდან საერთაშორისო ვიზიტორთა რაოდენობა შემცირდა 8.5%-ით  (207 899 ვიზიტორი), ხოლო  ტურისტული ვიზიტების რაოდენობა შემცირდა 17%-ით (148 298 ტურისტი). შედარებისთვის, 2018 წლის აგვისტოში რუსეთიდან ტურისტული ვიზიტების რაოდენობა გაზრდილი იყო 23.4%-ით.  აღნიშნული ზრდის ტემპის შენარჩუნების პირობებში, 2019 წლის აგვისტოში რუსეთიდან 220 521 ტურისტული ვიზიტი განხორციელდებოდა, თუმცა მხოლოდ 148 298 ტურისტული ვიზიტი შედგა, რაც მოსალოდნელზე 72 223 ვიზიტით ნაკლებია.

·         რაც შეეხება 2019 წლის 8 თვის მონაცემებს - 2019 წლის იანვარ-აგვისტოს  პერიოდში საქართველოში 6 320 516 საერთაშორისო  მოგზაურის ვიზიტი განხორციელდა, რაც წინა წლის ანალოგიურ მაჩვენებელს 7.2%-ით აღემატება.

 

დეტალური სტატისტიკა ასეთია:

ევროკავშირის ქვეყნები:

ევროკავშირის ქვეყნებიდან საქართველოში საერთაშორისო ვიზიტების ზრდის კუთხით გამოირჩეოდნენ: ნიდერლანდები (43.7%), გაერთიანებული სამეფო (32.5%),  პოლონეთი (31.6%), გერმანია (27.1%), საფრანგეთი (23.1%)  და სხვა.

სხვა ქვეყნები, საიდანაც განსაკუთრებული ზრდა დაფიქსირდა:

უზბეკეთი (87.2%), ყირგიზეთი (63.3%), ყაზახეთი (53.4%), ჩინეთი (34.3%), საუდის არაბეთი (31.5%) და სხვა.

ყველაზე მეტი საერთაშორისო ვიზიტორი:

აზერბაიჯანი  (226,133, ზრდა -12.8%), სომხეთი  (191,817; ზრდა 4.5%) და თურქეთი (154,834; ზრდა -6.8%).  

შემოსავლები ტურიზმიდან:

წინასწარი მონაცემებით, 2019 წლის იანვარი-ივლისის მონაცემებით, შემოსავალი საერთაშორისო მოგზაურობიდან საქართველოში შეადგენს 1.8 მლრდ. აშშ დოლარს (ზრდა 2.1%), რაც 38 მლნ. აშშ დოლარით მეტია წინა წლის ანალოგიურ მაჩვენებელზე.

2019 წლის I კვარტალში შემოსავალი საერთაშორისო მოგზაურობიდან საქართველოში შეადგენს 578 მლნ. აშშ დოლარს (ზრდა 5%), რაც 28 მლნ. აშშ დოლარით მეტია წინა წლის ანალოგიურ მაჩვენებელზე.

ტურიზმის წილი მთლიან შიდა პროდუქტში 2019 წლის I კვარტლის მონაცემებით, შეადგენს 7.1%-ს. ზრდა წინა წელთან შედარებით 14.9%-ია.