მამუკა ხაზარაძე პოლიტიკური და მორალური ფსკერისკენ მიზანმიმართულ სვლას განაგრძობს, რომლის ილუსტრაცია გუშინ "ნაციონალური მოძრაობის" პროპაგანდისტული მანქანის ეთერში მოახდინა.
ქართულმა და საერთაშორისო საზოგადოებამ კარგად იცის ორი რამ, რომ ხაზარაძე მხილებულია ფულის გათეთრებაში და ხაზარაძემ ჩააგდო ანაკლიის პროექტი.
არსებობს ქართული ანდაზა -ჩემი შენ გითხარიო. „ნაციონალური მოძრაობის“ პროპაგანდის საუკეთესო ტრადიციებში - დააბრალე ოპონენტს ის, რაც თავად ჩაიდინე - „ნაციონალურ მოძრაობასა“ და გვარამიასთან ტრენინგ გავლილი და მათი მთავარი პოლიტიკური პარტნიორი ხაზარაძე უსუსურად ცდილობს, ფულის გათეთრება დაუკავშიროს ბიძინა ივანიშვილის სახელს და ანაკლიის პროექტის ჩაგდებაზე პასუხისმგებლობა საქართველოს ხელისუფლებას აჰკიდოს. ის კადრულობს და არ ერიდება ცილისწამებას, ჭორაობას, ფაქტების გაყალბებას. ხაზარაძე ორგანულად ჩაეწერა ფეიკნიუსების ქარხნის კოლექტივში და გუშინ ამ ქარხნის დამკვრელური ბრიგადის, გვარამია-მელაძის ღირსეულ პარტნიორად ვიხილეთ. ეს არის მისი უსუსური მცდელობა დაიძვრინოს თავი ვალდებულებებისა და სისხლის სამართლებრივი პასუხისმგებლობისგან, რაც რასაკვირველია განწირულია ფიასკოსთვის.
ისტორიის წაშლის მცდელობა ნაცების ერთ-ერთი მნიშვნელოვანი ინსტრუმენტია.
გავიხსენოთ ფაქტი, თუ რატომ გახდა ბიძინა ივანიშვილი პროგრეს ბანკის აქციონერი. როდესაც 2011 წლის ოქტომბერში ბიძინა ივანიშვილი შემოვიდა პოლიტიკაში და ეგზისტენციური საფრთხე შეუქმნა რეჟიმს, ყველას გვახსოვს, როგორი დარტყმა მიაყენეს ქართუ ბანკს, რაც სახელმწიფოს მიტაცების კლასიკური შემთხვევა იყო, როდესაც მთელი სახელმწიფო ინსტიტუციების დახმარებით ბანკის გაკოტრების აბსოლუტურად უკანონო პროცესი დაიწყეს. იმავე პერიოდში, პოლიტიკაში მონაწილეობის სურვილი გამოთქვა კახა კალაძემ და რასაკვირველია, რეჟიმმა, რომელმაც ერთი მეთოდი იცოდა - სიცრუე და ძალადობა - დაიწყო ძალადობა კახი კალაძის პროგრეს ბანკზეც, სადაც ასევე დაიწყეს მენეჯმენტის, დეპოზიტარებისა და კრედიტორების დაშინება, ასევე დაიწყეს ბანკის გაკოტრების პროცესი. ბიძინა ივანიშვილმა მაშინ განახორციელა პოლიტიკური ქველმოქმედება, მიიღო გადაწყვეტილება, დახმარებოდა პროგრეს ბანკს, რათა გადაერჩინა დეპოზიტარები, რომლებიც უფულოდ რჩებოდნენ ბანკის გაკოტრების შემთხვევაში. სწორედ ამ მიზნით შევიდა ბანკის კაპიტალში. არასოდეს, არც მაშინ და არც ამის შემდეგ, ბიძინა ივანიშვილს ბანკის მმართველობაში მონაწილეობა არც პირდაპირ, არც წარმომადგენლის მეშვეობით არ მიუღია, არ ჰყოლია წარმომადგენელი არც დირექტორთა, არც სამეთვალყურეო საბჭოში; ეს იყო პოლიტიკური ქველმოქმქედების ერთჯერადი აქტი. და ბოლოს, როდესაც ეს ბანკი გაიყიდა, ბიძინა ივანიშვილს ერთი თეთრიც კი არ მიუღია.
სულ რომ თვალი დავხუჭთ რეალობაზე, გავყვეთ ხაზარაძის ვერსიას და თეორიულად დავუშვათ, რომ ხაზარაძე რასაც ამბობს, რეალობასთან რაიმე შეხებაშია,რა გვითხრა გუშინ რეალურად ხაზარაძემ?!
ხაზარაძემ გვითხრა, რომ ის ყიდულობდა პროგრეს ბანკს, რა დროსაც, აუდიტის მეშვეობით, აღმოაჩინა, რომ ამ ბანკში იყო მრავლობითი ტრანზაქციები, რომლებიც ატარებდნენ ფულის გათეთრების ნიშნებს. და როგორ უნდა მოქცეულიყო ამ შემთხვევაში კანონმორჩილი და საკუთარ ბიზნეს რეპუტაციაზე მზრუნველი ბიზნესმენი - პირველი, ის არ შეიძენდა არცერთ აქტივს; იმიტომ, რომ აბსურდია - ბანკში სადაც ფულს ათეთრებენ, რაიმე სუფთა იყოს, რომელთან მიკარებაც შეიძლება. ეს არის შეუძლებელი.
ამიტომ, ამ შემთხვევაში - მას არაფერი არ უნდა ეყიდა პროგრეს ბანკიდან, მეტიც, ის იყო ვალდებული სახელმწიფოს წინაშე, დაუყოვნებლივ მიემართა პროკურატურისთვის, რათა არ ჩაედინა განუცხადებლობის დანაშაული.
როგორ მოიქცა ხაზარაძე? ხაზარაძემ იყიდა ბანკის აქტივები და არაფერი არავისთვის არ უთქვამს. ამით ყველაფერ ნათქვამია!
ახლა, 3 წლის მერე, როდესაც თავად იქნა მხილებული ფულის გათეთრებაში, თვითონ ჩააგდო ანაკლიის პროექტი და საკუთრ დანაშაულებრივ საქმიანობაზე ინდულგენციის მისაღებად ჯერ თიბისი ბანკს ამოეფარა და მერე ანაკლიის პროექტს, საიდანღაც, საკუჭნაოდან ამოღებული სამარცხვინო ვერსიით უსუსურად ცდილობს თავი დაიცვას, ბედავს შეტევა განახორციელოს ხელისუფლებაზე და ბიძინა ივანიშვილზე.
პოტენციურად რომც დავუშვათ, რომ ბანკში, რომლის პასიური აქციონერი იყო ბიძინა ივანიშვილი და ამ პერიოდში ხდებოდა რაღაცა ტიპის კანონშეუსაბამო ტრანზაქციები, რა შუაშია ამასთან პასიური აქციონერი ბიძინა ივანიშვილი?!
როდესაც ხაზარაძე და გვარამია წყვილში თავისი ჭკუით გვამუნათებენ, დაიწყება თუ არა გამოძიება ამ განცხადებაზე, დაიბარებენ თუ არა გამოკითხვაზე ყოფილ აქციონერ ბიძინა ივანიშვილს.
რა სტანდარტით პროპაგანდირებენ ამ სისულელეს?! რა არის ქართული, ან საერთაშორისო სტანდარტი და პრაქტიკა მსგავს საქმეებზე?!
როდესაც ხაზარაძე და ჯაფარიძე მიეცნენ პასუხისგებაში ფულის გათეთრებისთვის და ტრანზაქცია განხორციელდა თიბისი ბანკის მეშვეობით, თიბისი ბანკის ათასობით აქციონერს წარუდგინა პრეტენზია საქართველოს პროკურატურამ?
თიბისი ბანკის ათასობით აქციონერის, ფიზიკური, თუ იურიდიული პირების მიმართ, რამე პრეტენზია გამოთქვა პროკურატურამ, მათი სისხლის სამართლებრივი დევნა დაიწყო, ან დაკითხვებზე ატარა? ეს ხომ აბსურდია.
ხაზარაძე საკუთარ ტყუილებსა და შეთხზულ ჭორებში ისე აიბლანდა, უკვე სრულად დაკარგა ლოგიკა და რეალობის შეგრძნება.
უკვე ყველაფერზე აბსურდული ჭორებს თხზავს, ჯერ ამბობს ვითომ ბიძინა ივანიშვილმა თქვა მამერიკელებს შავ ზღვაში რა უნდათო, მერე აზრი შეიცვალაო.
ეს აბსურდული ბოდვა, ჭორაობა, უკადრებელია საკუთარი თავის პატივისმცემელი კაცისთვის. ხაზარაძემ თავისი განცხადებებით უკვე ფსკერი ჩახვრიტა. რა თქმა უნდა, ამაზე სერიოზული კომენტარის გაკეთებაც არ შეიძლება.
ბიძინა ივანიშვილის და "ქართული ოცნების" გეოპოლიტიკური პრეფერენციები და არჩევანი სრულ თანხვედრაშია ქართველი ხალხის არჩევანთან და გამყარებულია კონსტიტუციითა და ნაბიჯებით, რომელიც საქართველომ, ჩვენმა ხელისუფლებამ გადადგა ამ გზაზე.
ის სამარცხვინო ჭორაობა კი, რომელიც გუშინ ჭორ-ბიუროში და არა ტელევიზიაში გაიმართა, მართლა კომენტარსაც არ იმსახურებს.
ფაქტი ერთია - ხაზარაძე არის ფულის გათეთრებაში ბრალდებული პირი, რომელმაც ანაკლიის პროექტი გუშინ კიდევ ერთხელ ჩააგდო, ვერ შეასრულა და არ შეასრულა არცერთი ვალდებულება, მიაყენა ძალიან დიდი ზიანი საქართველოს, ქართველ ხალხს.
და მიუხედავად მისი მხრიდან, ნაკისრი ვალდებულებების მრავალგზის ჩაგდებისა, როდესაც სახელმწიფომ დღის წესრიგში ანაკლიის კონსორციუმთან ხელშეკრულების გახანგრძლივების საკითხი კიდევ ერთხელ დააყენა, ანაკლიის განვითარების კონსორიცუმმა გადადგა სამარცხვინო ნაბიჯი და დოკუმენტაცია საერთოდ არ წარადგინა.
ეს იყო პრევენციული ნასბიჯი იმ რკინის არგუმენტებისგან თავის ასარიდებლად, რომელიც სახლემწიფოს აქვს კონსორციუმის მიმართოს მიწერა.