• ბიძინა ივანიშვილის ინტერვიუ სახელმწიფოებრივი აზროვნების, საკუთარ ქვეყანაზე ზრუნვის და უანგარო ქველმოქმედის მაგალითია.
• ამ ინტერვიუთი ოპონენტების მხრიდან წარმოებულ ყველა ცილისწამებას და აბსურდულ ბრალდებას, ამომწურავი და დამაჯერებელი პასუხი გაეცა და კიდევ ერთხელ კარგად გამოჩნდა ამ ადამიანის როლი და მისია, ყველა იმ საშვილიშვილო პროექტში, რასაც აკეთებს ჩვენი ქვეყნისთვის.
• ბიძინა ივანიშვილმა ჩვეული გულწრფელობითა და თავმდაბლობით განმარტა, რომ მისთვის ქველმოქმედებას მაშინ აქვს ფასი, თუ ის ანონიმურია. თუმცა პოლიტიკაში შემოსვლამ და მოძალადე რეჟიმის ჩამოცილებამ, რაც მისი შეფასებით, მის მიერ გაღებული ყველაზე დიდი ქველმოქმედებაა, ეს შესაძლებლობა შეუზღუდა. რეალობის მოდელირების მიზნით, ოპონენტებმა მისი პროექტები საჯარო განხივლის საგნად აქციეს და ახლაც, შავის თეთრად და თეთრის შავად წარმოჩენის მიზნით არაერთი სპეკულაცია ვრცელდება, რის საპასუხოდაც მიმდინარე თუ დაგეგმილი პროექტების საზოგადოებისთვის სწორად მიწოდების საჭიროება დგება.
• მან ხაზგასმით აღნიშნა, რომ საქართველოში არასდროს უწარმოებია ბიზნესი კლასიკური გაგებით, ბიზნესი მოგებისთვის. მისი ბიზნესპროექტები საბოლოო ჯამში საქველმოქმედო ხასიათისაა და ერთადერთ მიზანს, სახელწმიფო ინტერესებსა და ეროვნული ეკონომიკის სუსტი რგოლების გაძლიერებას, კერძო ბიზნესის სტიმულირებას ემსახურება, რომელიც ნორმალურ სახელმწიფოში ყველაზე მეტ ადამიანს ასაქმებს.
• ინტერვიუში დეტალურად არის საუბარი წყალტუბოს აღორძინების პროექტზე, რომელიც მთელს რეგიონს გამოაცოცხლებს, ათასობით მოქალაქეს დაასაქმებს და რაც მთავარია, კერძო სექტორს მისცემს სტიმულს, ერთგვარ გარანტიას, წყალტუბოს აღორძინების პროექტში ქართული ბიზნესის ჩასართავად.
• მან კიდევ ერთხელ განმარტა, რომ მზად არის პროექტის მიმდინარეობისა თუ დასრულებისას, კერძო სექტორს მისი ინვესტიცია ფასდაკლებით გადასცეს.
(როგორც მან აღნიშნა, ყველა ობიექტს, რომელსაც ხელს მოკიდებს სამ წელიწადში დაასრულებს.)
• სწორედ ასეთ მოდელთან გვაქვს საქმე აბასთუმანშიც, სადაც ბიძინა ივანიშვილის მიერ ინფრასტრუქტურის განვითარებაში გაღებული ქველმოქმედებისა და სასტუმროს მშენებლობის შემდეგ, ქართული ბიზნესი პოზიტიურად გამოეხმაურა და პარაგრაფთან ერთად, უკვე ხუთი მაღალი დონის სასტუმრო შენდება, ჯამურად კი აბასთუმანში ინვესტციამ მილიარდნახევარ ლარს მიაღწია.
• ბიძინა ივანიშვილის ოჯახის პრინციპია - როდესაც გაქვს რესურსი, სახელმწიფოს უნდა დაეხმარო და შეღავათებით არ ისარგებლო, რაც აბასთუმანში კიდევ ერთხელ დადასტურდა. როდესაც სახელმწიფო მზად იყო, საავადმყოფოს ასაშენებლად ტერიტორია ინვესტორისთვის უსასყიდლოდ გადაეცა, თუმცა ამ პირობითაც კი არავინ აიღო რისკი, ბიძინა ივანიშვილმა მასში საბაზრო ფასი, 3 მილიონ 485 ათასი ლარი გადაიხადა და ეს თანხა ბიუჯეტში შევიდა.
• ინტერვიუში საუბარი შეეხო “ტურიზმის განვითარების ფონდის” საქმიანობას, რომელიც “თანაინვესტირების ფონდს” გამოეყო და ძირითადად სოციალურად ორიენტირებულ და დაბალრენტაბელურ პროექტებს ახორციელებს. ბიძინა ივანიშვილმა სასტუმრო “პარაგრაფის” მაგალითზე განმარტა, თუ რატომ არის მნიშვნელოვანი მსგავს პროექტებში ინვესტირება. მისი მიზანია ჩვენი ქვეყნის ზღვისპირეთი უფრო მეტად კონკურენტუნარიანი გახდეს, რისთვისაც საჭიროა ტურისტული სეზონი მხოლოდ ზაფხულის თვეებით არ შემოიფარგლოს და სერვისი მაღალმხარჯველობითი ტურისტებისთვის მიმზიდველი გახდეს. სწორედ “პარაგრაფის” მსგავსი, ექსკლუზიური სერვისების მქონე პროექტებია იმის გარანტი, რომ ტურისტი ორჯერ და სამჯერ მეტს დახარჯავს ჩვენს ქვეყანაში, რაც ეკონომიკისთვის უდიდესი სტიმულია.
• ბიძინა ივანიშვილმა უპასუხა “ქართუ” ბანკზე დასმულ შეკითხვასაც და მკაფიოდ განმარტა, რომ საინვესტიციო ბანკის დაარსების მიზანიც მაშინდელი სუსტი საბანკო სისტემის განვითარება იყო. მისი თქმით, “ქართუ” არასდროს უწარმოებია აგრესიული ბიზნესი და ხელი არავისთვის შეუშლია, რასაც თუნდაც ისიც ადასტურებს, რომ სხვა ბანკებთან შედარებით, “ქართუს” ჭარბი მოგება არასდროს ჰქონია. ახლაც, ბიძინა ივანიშვილი მზადაა, ბანკი გაასხვისის მხოლოდ იმ პირობით, რომ ძლიერმა მოთამაშეებმა არ შთანთქან და მესამე, ძლიერმა ბანკმა ბაზარზე ჯანსაღი კონკურენცია აწარმოოს.
• ინტერვიუში საუბარი შეეხო “პანორამა თბილისის” პროექტსაც, რომლის სამი ნაწილი სხვადასხვა სეგმენტზე იქნება გათვლილი და თბილისის ტურისტულ პოტენციალს ახალ ეტაპზე გადაიყვანს. ქალაქის ცენტრში არსებული სასტუმრო მაღალშემოსავლიან ტურისტებზე იქნება გათვლილი, მეორე სასტუმრო საქმიან ტურიზმსა და კონფერენციების მასპინძლობაზე, მესამე სასტუმრო კი თაბორის მთაზე გოლფის უნიკალური მოედნებით დაიტვირთება, რაც ასევე მაღალშემოსავლიან ტურისტებზე იქნება გათვლილი. როგორც წყალტუბოზე, აქაც 10-30% -იანი ფასდაკლებით, ბიძინა ივანიშვილი მზადაა პროექტი კერძო ბიზნესს გადასცეს.
• ბიძინა ივანიშვილი ბერას მიერ განხორციელებულ ქველმოქმედებასაც გამოეხმაურა და ის გულწრფელ ნაბიჯად შეაფასა, ამ თემაზე მოყოლილ სპეკულაციები კი პასუხის ღირსადაც არ მიაჩნია. ყველამ კარგად იცის, რომ თბილისში, სტიქიის ლიკვიდაციის სამუშაოებში მას ქველმოქმედება აქვს განხორციელებული, აპირებდა ბორჯომ-ხარაგაულის ტყე პარკის დაფინანსებასაც, თუმცა პროფესიონალების ანალიზით, რომლებიც მისი ვერტმფრენით კვლევებს ახორციელებდნენ, ბუნების რეგენერაციის პროცესში ჩარევა საჭირო აღარ გახდა.
• ინტერვიუში ახალი ინიციატივის შესახებაც გავიგეთ, რომელიც მთაწმინდიდან კუს ტბამდე, 400 ჰექტარი ტერიტორიის გამწვანებას და ბილიკების მოწყობას გულისხმობს, უნიკალური ჯიშების დარგვას გულისხმობს, რაც თბილისის ტურისტულ პოტენციალსა და ხედს ყველა სეზონისთვის კიდევ უფრო მიმზიდველს გახდის.
• ინტერვიუს ბოლოს, ბიძინა ივანიშვილმა პირობა დადო, რომ Entrepreneur-ის ინიციატივით ორგანიზებულ შეხვედრას აუცილებლად დაესწრება, სადაც ის საკუთარ გამოცდილებას ჩვენი ქვეყნის მომავალს, ახალგაზრდა ბიზნეს ლიდერებს, სტარტაპერებსა და ანტერპრენერებს შეხვდება.
• დასასრულ, ბიძინა ივანიშვილს არაერთხელ აქვს გაცხადებული, რომ მისი ქონების არანაკლებ 90% საზოგადო საქმეს ანუ ქველმოქმედებას უნდა მოახმაროს. ამ განცხადებას ტენდენციური მედიები და ოპონენტები არ აშუქებენ და საგულდაგულოდ მალავენ, რომ როგორმე ცილისწამებისა და აბსურდული ბრალდებების კამპანია გააგრძელონ, თუმცა ქართველი ხალხი ბრძენია, ყველაფერს კარგად ხედავს და ყველაფერს საკუთარ სახელს არქმევს.